دارایی پەرلەمان: گومرگ و باج دەتوانن رۆڵیان هەبێت لە بنیاتنانی بودجەدا

بەغداد - INA 
ئەمڕۆ چوارشەممە، لیژنەی دارایی پەرلەمان ڕایگەیاند: گومرگ و باج دەتوانن ڕۆڵیان هەبێت لە بنیاتنانی بودجەدا.
نوسینگەی ڕاگەیاندنی سەرۆكی لیژنەكە لە بەیاننامەیەكدا كە بۆ ئاژانسی هەواڵی عێراقی ناردووە، دەڵێت: لیژنەكە بە سەرۆكایەتی ئەندازیار عەتوان عەتوانی بەردەوامە لە زنجیرە كۆبوونەوەكانی لەگەڵ بەرپرسانی حكومی پەیوەندیدار بە مەلەفی دارایی، و ئەمەش پەیوەندی بە خشتەی بودجەی گشتی ساڵی 2025ەوە هەیە، هەروەها ئەمڕۆ چوارشەممە، لە بارەگاكەی لەناو بینای ئەنجومەنی نوێنەران، میوانداری بەڕێوەبەرە گشتییەكانی دەستەی گومرگ و باجی كرد بۆ گفتوگۆكردن و پشكنینی كۆمەڵێك فایلی گرنگ.
ئاماژەی بەوەشكرد: عەتوانی كۆبوونەوەكەی بە قسەكردن لەسەر گرنگی زۆرترین داهاتی نا نەوتی دەستپێكرد، لەڕێگەی ئۆتۆماتیكیكردن و كۆنتڕۆڵكردنی دەروازە نافەرمییەكان و پێداچوونەوە بە لێخۆشبوونەكان، و وتیشی: ئەمەش بە تاكە ڕێگە دادەنرێت بۆ ئەوەی ئەو داهاتانە زۆرتر بێت، ئەگەرنا ماڵی گشتی بەردەوام دەبێت لە بەفیڕۆدان.
عەتوانی لەمیانی كۆبوونەوەكەدا جەختیكردەوە: داهاتەكانی دەستەی گومرگ و باج هاوتا نییە لەگەڵ جوڵەی بازرگانی و هاوردە، و وتیشی: دەبێت لێخۆشبوونی گومرگی بگاتە گەڕانەوەی دارایی و گەشەپێدان، بە پێچەوانەوە دەرگایەكن بۆ گەندەڵی و بەفیڕۆدانی سامانەكەمان.
ئاشكراشیكرد: كاتی ئەوە هاتووە گومرگ و باج ڕۆڵی سەرەكی خۆیان لە داڕشتنی سیاسەتی داراییدا بگێڕن، وتیشی: داهاتی گومرگی و باج هاوتا نییە لەگەڵ جوڵەی بازرگانی و هاوردەكردن و پرسیاری ئەوەشی كرد، ئایا مەعقولە داهاتی گومرگی و باجەكانمان ساڵانە بگاتە نزیكەی 6 ترلیۆن دینار لەكاتێكدا قەبارەی هاوردەكردن ساڵانە 60 ملیار دۆلار تێدەپەڕێت؟.