مالیکی جەخت لەسەر گرنگی کارکردن بۆ دۆزینەوەی ڕێگاچاریەک بۆ کەمکردنەوەی ململانێکان لە ناوچەکە دەکاتەوە

بەغدا-INA
 ئەمڕۆ یەکشەممە"نووری مالیکی" سەرۆکی هاوپەیمانی دەوڵەتی یاسا،جەختی لە گرنگی کارکردن بۆ دۆزینەوەی ڕێگاچارەیەک بۆ کەمکردنەوەی توند و تیژی و ململانێکان لە ناوچەکە و ڕاگرتنی تاوانکارییەکانی ڕژێمی زایۆنی دژی گەلانی فەلەستین و لوبنان کرد .
نووسینگەی ڕاگەیاندنی سەرۆکی هاوپەیمانی دەوڵەتی یاسا لە ڕاگەیەندراوێکدا کە بۆ ئاژانسی هەواڵی عێراقی (INA) ناردوویەتی، تیایدا هاتووە : ئەمڕۆ یەک شەممە "نووری مالیکی" سەرۆکی هاوپەیمانی دەوڵەتی یاسا، لە نووسینگەی تایبەتی خۆی پێشوازی لە "ئیلێنا ڕۆمانسکی" باڵیۆزی ئەمەریکا لە عێراق کرد.
وەک ڕاگەیەندراوەکە ئاماژەی پێداوە : لەدیدارێکدا  بیروڕا سەبارەت بە پێشهاتەکانی گۆڕەپانی ناوچەیی و نێودەوڵەتی ئاڵوگۆڕ کرا و هەوڵەکانیش بە ئامانجی ڕاگرتنی دەستدرێژیەکانی ڕژێمی زایۆنی بۆ سەر فەلەستین و لوبنان و هەروەها کۆمەڵێک پرس و مەلەفی جێگای بەرژەوەندی هاوبەش تاوتوێکران .
بەگوێرەی ڕاگەیەندراوەکە : "مالیکی" جەختی لە گرنگی پتەوکردنی پەیوەندییە دووقۆڵییەکانی نێوان هەردوو وڵات و پەرەپێدانی بەگوێرەی ڕێککەوتنی چوارچێوەی ستراتیژی، بەتایبەتی دوای ئەوەی لە ئەنجامی هەڵبژاردنەکانی ئەمریکا ئیدارەیەکی نوێی پێکدەهێنرێت.
هەروەك جەختیکردەوە لە گرنگی کارکردن بۆ دۆزینەوەی ڕێگەچارە بۆ کەمکردنەوەی گرژییەکان.
هەر بەگوێرەی ڕاگەیەندراوەکە : "مالیکی " ڕەخنەی لە بێدەنگی کۆمەڵگەی نێودەوڵەتی و دامەزراوەکانی گرت سەبارەت بەو وێرانکاری و کوشتن و ئاوارەبوونی خەڵکی مەدەنی بێتاوان لە لوبنان و فەلەستین.
لای خۆیەوە باڵیۆزی ئەمەریکا  پشتیوانیی وڵاتەکەی بۆ سەقامگیری عێراق دووپاتکردەوە، هەروەك جەختیشی لە  پێشکەشکردنی هاوکاریی پێویست و بەردەوام کردەوە بۆ عێراقییەکان لە چوارچێوەی ڕێککەوتنی چوارچێوە ستراتیژی نێوان هەردوو وڵات.