قوباد تاڵەبانی پێشوازی لە ئەلینا رۆمانۆسکی، باڵیۆزی ئەمریکا لە عیراق ده‌كات

به‌غدا-INA
قوباد تاڵەبانی، جێگری سەرۆک وەزیرانی هەرێمی کوردستان پێشوازی لە ئەلینا رۆمانۆسکی، باڵیۆزی ئەمریکا لە عیراق کرد    
نووسینگه‌ی ڕاگه‌یاندنی جێگری سه‌رۆك وه‌زیرانی هه‌رێمی كوردستان له‌ڕاگه‌یه‌ندراوێكدا كه‌بۆ ئاژانسی هه‌واڵی عێراقی ناردووه‌، ڕاگه‌یاندووه‌" لەدیدارەکەدا کە ئەمڕۆ (4ی تشرینی دووەمی 2024) لە هەولێر بە ئامادەبوونی ستیڤ بێتنەر، کونسوڵی ئەمەریکا لە هەرێمی کوردستان و ئەحمەد موفتی، بریکاری وەزیری سامانە سروشتییەکان بەڕێوەچوو، هەردوولا دۆخی هەرێمی کوردستانیان لە پاش هەڵبژاردن و میکانیزمەکانی پێکهێنانی حکومەتی نوێیان تاوتوێ کرد. قوباد تاڵەبانی ڕوونی کردەوە، یەکێتی دیدگایەکی تایبەت بەخۆی هەیە بۆ پێکهێنانی حکومەت و کراوەشە بەڕووی هەموو ئەوانەی لەو دیدگایەوە نزیکن لە پرۆسەکەدا.    
لە دیدارەکەدا هەردوولا هاوڕابوون لەسەر گرنگی پێکهێنانی حکومەتی هەرێمی کوردستان و  پەلەکردن لەو پرۆسەیە و پێشگرتن لە هەر ئەگەرێکی نەخوازراوی ناوچەیی و هەرێمایەتی.    
 قوباد تاڵەبانی جەختیشی کردەوە یەکێتیی نیشتمانیی کوردستان هەوڵدەدات بۆ پێکهێنانی حکومەتێکی نیشتمانیی بەرپرسیار لەبەردەم خەڵکی کوردستان کە دادگەرانە و بە شێوازێکی هاوسەنگ لەسەر بنەمای هاوبەشی ڕاستەقینە کار بکات.
لەبارەی پەیوەندییەکانی نێوان هەرێم و بەغدا و ململانێیەکانی ناوچەکە، جەخت لە پابەندبوون بە دەستوور و کارکردنی هاوبەش بۆ ڕێگەگرتن لەپەرەسەندنی ئاڵۆزییەکان و یەکلاکردنەوەی ناکۆکییەکان لەسەر بنەمای دیالۆگ و بەرژەوەندی هاوبەش کرایەوە.