نێچیرڤان بارزانی: پرۆسەی یەكخستنی پێشمەرگە سەردەخەین‌

هەولێر - INA
ئەمڕۆ پێنجشەممە، نێچیرڤان بارزانی سەرۆكی هەرێمی كوردستان، لە ڕێوڕەسمی بیست و نۆیەمین خولی دەرچووانی پێگەیاندنی كۆلێژی سەربازیی دووی زاخۆ، رایگەیاند: پرۆسەی یەكخستنی پێشمەرگە سەردەخەین‌.
نوسینگەی راگەیاندنی سەرۆكی هەرێم لە راگەیەنراوێكدا كە بۆ ئاژانسی هەواڵی عێراقی ناردووە، دەڵێت: سەرلەبەیانیی ئەمڕۆ پێنجشەممە، نێچیرڤان بارزانی سەرۆكی هەرێمی كوردستان، بەشداری لە ڕێوڕەسمی بیست و نۆیەمین خولی دەرچووانی پێگەیاندنی كۆلێژی سەربازیی دوو ی زاخۆ كرد كە ژمارەیەك لە بەرپرسانی حكوومەتی هەرێمی كوردستان و حزب و لایەنەكان و فەرماندە و ئەفسەر و مامۆستایانی كۆلێژی سەربازی و كەس و كاری قوتابیان تێیدا ئامادە بوون.
لە ڕێوڕەسمەكەدا دوای نمایشی سەربازیی دەرچووان، نێچیرڤان بارزانی وتەیەكی پێشكەش كرد، ئەمە دەقەكەیەتی:
دەرچوویێت خۆشتڤی،
ئامادەبوویێت هێژا،
ڕۆژ باش.. هوین هەمی گەلەك ب خێر هاتن سەرچاڤا..


گەلەك خۆشحالم كو دگەل هەوەیێن ڕێزدار، بەشدارییا دەرچوونا خولا (29)ێ یا پێگەهاندنا كۆلێژا سەربازی یا دو یا زاخۆ دكەم. ئەڤ دیمەنە بۆ مە و بۆ هەمی خەلكێ كوردستانێ، جهێ شانازیێیە كو (792) ئەفسەرێت مە یێت گەنج، خویندنا خۆ یا سەربازی، یا ئەكادیمی و پراكتیكی بدویماهی تینن.
جهێ دەستخۆشی و سەربلندییەكا مەز‌نە، پشتی كو هەوە خویندنا خۆیا زانكۆیی بدویماهی ئینای، هوین ب خواست و ڤیانا خۆ هاتی، داكو خویندنا سەربازی ژی بدویماهی بینن و ببنە ئەفسەرێت پێشمەرگەی. ئەڤ‌ ناڤ نیشانێ حەزكرن و دلسۆزییا هەوە‌ بۆ خزمەتێ و بۆ كوردستانێ نیشا ددەت. هەر بژین، هەر سەركەفتی بن. 
یا زێدە جهێ خۆشحالیێ، دناڤ ڤان دەرچوویادا، (50) كچێت كوردستانێ، (13) ئێزدی و دەرچوویەكێ كاكەیی هەنە. ئەڤە دلخۆشییەكا مە هەمیانە. ب گەرمی و ب دل پیرۆزباهیێ ل هەوە هەمیا دكەم، ل مالبات و كەسوكارێت هەوە دكەم كو ئەڤرۆ د ڤێ مەراسیمێدا دگەل مە بەشدارن، پیرۆز بیت ل وان، پیرۆز بیت ل هەوە، هیڤییا سەركەفتنێ بۆ وە دخوازم. 
ئەز ژی دگەل مالباتێت هەوە ئەڤرۆ ڤێ ئاهەنگێ دگێڕین و پر ب دل شانازیێ ب وە دكەم، ئەو شانازییا كو مالباتێت وە ب هەوە دكەن، ئەز ژی ل جهێ خۆ شانازیێ ب هنگۆ دكەم و ب ئانەهییا خودێ هەر سەركەفتی و سەرفەراز بن و د ژیانا خۆ دا.
من دڤێت ئەز تشتەكێ ژی ببێژم، دناڤ مەدا ئەڤرۆ كەسەك ئامادەیە كو وەكی باب یێ بەشدارە د ڤێ مەراسیمێدا، ئەو ژی فەرماندەیەكێ مە بوو كو خزمەتەكا مەزن یا كوردستانێ كر و مخابن ل شەڕێ ئازادییا عێراقێ بریندار بوو، ئەم هەمی پێكڤە بە چەپلەیەكی بخێرهاتنێ ب وەجی بارزانی دكەین كو دگەل مە یێ بەشدارە.
ئەز ژی وەكی مالبات چەوا مالباتا وە ئەڤرۆ لێرە د ئامادەنە ئێك ب ئێك یێت هنگۆ شانازیێ ب هنگۆ دكەن، ئەز ژی وەكی مالبات دێ بێژمێ، مام ئەم شانازیێ ب تە دكەین چونكی ئێك ل وان قوتابیی یێت دەرچوو ئەڤرۆ لێرە هەی كوڕێ وی یە و كوڕێ خۆ یێ پەروەردە كری و یێ فێر كری كو ئەو ژی لسەر ڤێ ڕێكێ یێ بەردەوام بیت، ئەو ڕێكا كو بابێ وی گرتی و تێدا بۆ ئازادییا عێراقێ و سەرفەرازییا مللەتێ مە بریندار بووی، كوڕێ خۆ ژی یێ پەروەردە كری كو لسەر وێ ڕێكێ یێ بەردەوام بیت، هنگ هەمی ڤێكڕا تەمەندرێژ و سەرفەرزان و سەركەفتی بن و مامێ وەجی تو ژی گەلەك بخێرهاتی سەرچاڤا و سەر سەرا و یێ پشتڕاست بە كو ماندیبوونا تە بۆ خزمەتا لەشكرێ كوردستانێ، ئەو ماندیبوونا تە كری هەمی گاڤا وەكی بەرپەڕەكێ زێڕین دێ ل خەباتا پێشمەرگایەتیێ و كوردستانێ هێتە نڤێسین و ئەم هەمی شانازیێ ب تە دكەین و هیڤیا سەركەفتنێ بۆ هەوە هەمیا دخوازم. هیڤیدارم جارا بهێت ژمارا ئافرەتا د ڤان خولادا زێدەتر ببیت.


گەلی دەرچوویێت هێژا، 


ژ ڕۆژا كو هەیە و هەتا ئەڤرۆ، پێشمەرگایەتی جهێ شانازی و شەرەفمەندیێ و بەرپرسیاریەتییەكا مەزن بوویە‌. ژ ڕۆژا كو ناڤێ پێشمەرگەی هەیە و هەتا ئەڤرۆ، باوەرییا كورد و كوردستانێ بخۆ، ب دۆزا خۆ و ب مافێت خۆ یێت ڕەوا، هەر موكوم و ڕۆژ ب ڕۆژ ژی موكومتر كریە‌.
پێشمەرگایەتی، ئەركەكێ گەلەكێ پیرۆزە، بەشەكێ گرنگ یێ ناسناما نیشتمانی و یا نەتەوەیی یا كوردستانێ یە. بەردەوامییا كاروانەكێ دویر و درێژێ خەبات و تێكۆشینێیه بۆ پاراستنا مللەتێ مە، بۆ پاراستنا كوردستانییا‌. ژبەر هندێ ژی، دەرچوونا هەوە یا ئەڤرۆ، سەركەفتن و بدویماهی ئینانا خویندنێ، دویماهیا ڕێكێ نییە. 
نەخێر، ئەڤرۆ، ئەو تشتێ ئەڤرۆ هنگ دەسپێدكەن، خزمەت و ئەركێ هەوە یێ نوییه دگەل دامودەزگەهێت حكوومەتێ بۆ كوردستانێ. ئەڤ ئەركە بۆ هەوە و بۆ مە هەمییا شانازییەكا مەزنە‌. هەیاما (9) هەیڤێت چوویی یێت مەشق و ڕاهێنان و فێربوونێ، هەوە ئەزموونەكا دەوڵەمەند وەرگرت، داكو ئەڤرۆ بشێن خزمەتا وەلاتێ خۆ بكەن.
باوەڕ‌ناما هەوە، هەر بتنێ دەسكەفتەكێ ئەكادیمی نییە، پەیمانا شەرەفمەندیێ و سیمبۆلا دلسۆزیێ و وەفاداریێ و ئەمانەتەكێ مەزنە بۆ خزمەتا مللەتێ خۆ و بۆ خزمەتا وەلاتێ خۆ. نیشانێ ئامادەیی و حازرییا هەوەیە بۆ هەر قوربانیدانەكێ د ڕێكا وەلاتیدا. 
د دیرۆكا بزاڤا ڕزگاریخازا گەلێ كوردستانێدا، پێشمەرگەی قوربانی یێت گەلەك مەزن دانە. ب هێزا پێشمەرگا، ڕوحا خۆڕاگری، خوینا خۆ دایە و ڕوحا بەرخۆدانێ بەرجەستە كرییە،‌ داكو هەمی جارا بەرەڤانیێ ل ئاخا كوردستانێ، ل دۆزا مللەتێ خۆ بكەن. هەمی دیرۆكا پێشمەرگاتیێ قەهرەمانی و مێرخاسی و قوربانیدانێت مەزن بۆ ئازادیێ و بۆ شكۆمەندییا كوردستانێ، سەرێ خۆ یێ دانای، بەلێ هیچ وەختەكی خۆ بۆ دوژمنی نەچەماندییە. 
ڤێ دویماهیێ كو مەزنترین ڕێكخراوا تیرۆریستی ل جیهانێ ب سەر عێراقێ و كوردستانێدا گرتی، پێشمەرگە بوو ل بەرۆكێت شەڕی، ب گیانێ خۆ و خەباتا خۆ، ئەفسانەیا داعشێ تێكشكاندی. ڕێ نەدا كوردستان بكەڤیتە دەستێ تیرۆرستا‌. لەوما، هندی كورد و كوردستان هەبن، پێشمەرگە دێ هەر مینیت ئیلهامبەخش و پارێزڤانێ گەلێ كوردستانێ و دێ مینیت سیمبۆلا خۆڕاگری و بەرخودانێ. لێرەدا ئەم بەژنا خۆ دچەمینین بۆ خوینا وان شەهیدا، ئەوێت كو د ڤێ ڕێكێدا خەبات كری و گیانێ خۆ كرییە قوربانی.
د ڤێ هەلكەفتنێدا، من دڤێت جارەكا دی، سوپاس و پێزانینێت هەرێما كوردستانێ بگەهینمە هێزێت هەڤپەیمانییا نێڤدەولەتی كو د شەڕێ داعشێدا پشتەڤانییا پێشمەرگا كر. هاریكاریا وان بۆ پێشمەرگا و هەروەستا هاریكارییا وان بۆ سوپایێ عێراقێ، یا ستراتیژی و یا ئێكلاكەرەڤە بوو. نموونەكێ زندی یێ هاریكارییا نێڤدەولەتی بوو، بۆ بەرهنگارییا ئەو تەحەدا یێت مەزنێت هەڤپشك كو هاتنە د ڕێكا مەدا. 
هەروەسا گرنگە بەحسێ هەماهەنگی و هاریكارییا ناڤبەرا پێشمەرگا و هێزێت سوپایێ عیراقی بكەین بەرامبەری تیرۆرستا. ب تایبەتی ئەو كارێ پێكڤە یێ كو مە هەردوولایا پێشمەرگە و سوپایێ عێراقێ هێزێت حەشدا شەعبی ڤێكڕا كری بتایبەتی ل دەڤەرێت مادەیا (140)، كو جهەكە مە ڤێكڕا كار كر دگەل سوپایێ عێراقێ بۆ بەرقەراركرنا ئاسایشێ و ئارامیێ و تەناهیێ. هەر ئەڤرۆ و د ڤێ هەلكەفێدا جارەكا دی ئەم سەرێ ڕێزێ بۆ خوینا وان شەهیدا دچەمینین ئەوێت كو د بەرگریكردن ل عێراقێ گیانێ خۆ فیدا كری چ سوپایێ عێراقێ بیت، چ حەشدا شەعبی بیت و چ پێشمەرگە بن. ب باوەرییا مە داعش هێشتا داعش گەف و مەترسییەكا جددییه لسەر ئاسایش و ئێمناهییا عێراقێ و ڤێ دەڤەرێ‌.
ژبەر هندێ گەلەك گرنگە و گەلەك ژی پێدڤییە هاریكارییا‌ بەردەوام هەبیت دناڤبەرا سوپایێ عێراقێ و هێزێت پێشمەرگەیدا، دڤێت ئەڤ كاریكاری و هەڤكاری بەردەوام بیت و بلا بیرا مە بهێت كو مە هەمییا ڤێكڕا خوین یا دای بۆ بەرگریكرنێ ل عێراق و كوردستانێ. ئەز هیڤیدارم ئەڤ هاریكارییا بەردەواما مە، ئەنجامێ وێ تەناهییەكا سەرتاسەری بیت بۆ عێراقێ و پاشەڕۆژەكا گەش بۆ عێراقێ و بۆ كوردستانێ و بۆ هەمی خەلكێ كو ل عێراقێ دژین. پێشمەرگە بەشەكە ژ سیستەمێ عێراقێ یێ بەڕەڤانیێ، لەوما چاڤەڕێ تێتە كرن عێراق ئەركێ خۆ یێ یاسایی ل بەرامبەر پێشمەرگەی جی بجی بكەت و پشتەڤان بیت و چەكداركرنا پێشمەرگەی، جێبەجێ بكەت. پێشمەرگە مەترسی نییە، پێشمەرگە بەرگریكارە ل عێراقێ و ل كوردستانێ و ل مرۆڤایەتیێ.
سوپاس و پێزانین و دەستخۆشی بۆ هێزێت ئەمەریكا و دۆستێت مە یێت دی یێت هەڤپەیمانییا نێڤدەولەتی، بۆ پشتگیرییا وان یا بەردەوام ل پرۆسا چاكسازیێ یا وەزا‌رەتا كاروبارێت پێشمەرگەی بۆ ڕێكخستنەڤە و ئێككرنا هێزێت پێشمەرگەی. 
ئەڤ پرۆسە‌یە نە وەكی مە دڤێت، و نە وەكی وان دڤێت،‌ لدویڤ تمووحێت مهنییە‌. كێشە یێت هەی و هێدی یا بڕێڤە دچیت. پێدڤییە ئەم هەمی لایەك كارەكێ جددی بكەین و ڤێ پرۆسێ سەربێخین. چێنابیت ئەم دۆست و هەڤپەیمانێت خۆ كو ب جددی كار دكەن بۆ ئێكگرتنا هێزێت پێشمەرگەی، بێ ئومێد بكەین. 
بۆ ڤێ چەندێ، پەیاما من بۆ دۆستێت مە یێت هەڤپەیمان ئەڤەیە، ئەم دێ بێژینە وان ڕاستە ئەڤ پرۆسە یا هێدی بڕێڤە دچیت، بەلێ ئیرادەكا جددی مە یا هەی بۆ هندێ هێزێت پێشمەرگە بكەینە هێزەكا نیشتمانی یا كوردستانی و مە دێ ئێك هێز هەبیت و ئێك وەزارەت دێ هەبیت و ئێك سەركردایەتی دێ هەبیت بۆ بڕێڤەبرنا پێشمەرگەی. گاڤ ب گاڤ دێ هەمی ئاستەنگ و ئاریشا چارەسەر كەین، هەتا ب ئانەهیا خودێ دگەهیتە دویماهییا ڤێ پرۆسێ.
ئەم بدروستی پابەندین كو لەشكرەكێ ئێكگرتی یێ پێشمەرگەی هەبیت. لەشكرەكێ نیشتمانی بیت كو دبن ڕێڤەبەری و كۆنترۆلا حكوومەتا هەرێما كوردستانێ و وەزارەتا پێشمەرگەی دا بیت.


دەرچوویێت هێژا،


ژبیر نەكەن، كۆلێژا سەربازی یا زاخۆ، هوین یێت پەروەردە كری و پێگەهاندی، داكو وەكی فەرماندێت زانا و خودان شیان، دگەل پاراستنا كوردستانێ، دادپەروەریێ و مرۆڤاهیێ ژی بپارێزن. پرەنسیپ و ڕەوشتێت بلند یێتنیشتمانپەرەوریێ، قوربانیدان و دیسپلین، ئەو بنەمایێت سەرەكینە كو پێدڤییە هەرگاڤ د هزر و دلێ ‌وەدا بمینن و بەردەوام بیر ل ڤان پرەنسیپا بكەنەڤە. 
ب خویندن و پەروەردە و فێربوونا هەوە ل ڤێ كۆلێژا سەربازی، ب وانەیێت وەلاتپارێزی و دلسۆزیێ بۆ ئەركێ خۆ و بۆ ئاخا خۆ، نە هەر دناڤ ڕێزێت پێشمەرگەیدا، هوین د ناڤ هەمی جڤاكێدا، دشێن ڕۆلەكێ جدا و گرنگ بگێڕن. هون دشێن ببنە نموونە و ئیلهامبەخشێت نڤشێت داهاتی، بۆ پاشەڕۆژەكا باشتر.
ڕۆلێ هەوە نە بتنێ یێ مەیدان و قادێت شەڕییە، بەلكی ئەركێ هەوە دڤێت مەزنتر بیت بۆ ئاڤاكرنا جڤاكەكا ئارام و تەنا بیت. هەروەسا بەر‌پرسیارییەكا هەوە یا دی، ئەوە كو بەهایێت دیموكراسیێ و مافێت مرۆڤی بپارێزن. كار بكەن داكو گرنگییا ڤا بەهایا دناڤ جڤاكێدا زێدەتر بەلاڤ ببیت. هون ببنە نموونەیەك بۆ پاراستنا دادپەروەریێ و پێكڤەبوونێ و بەڕەڤانیێ ل مافێت هەمی هەڤوەلاتی یێت هەرێما كوردستانێ. 
مە هەمیا باوەری یا ب هەوە هەی كو دێ شێن بەرامبەر تەحەدیا ڕاوەستن و د ئەركێ خۆدا سەركەڤن، داكو ب باشترین شێوە خزمەتا وەلاتێ خۆ بكەن. داكو د چارچۆڤەیا وەزارەتا كاروبارێت پێشمەرگەیدا، هێزا نیشتمانییا كوردستانێ بن. چ جارا نەبنە تەرەف، د كێشە و ناكۆكی یێت سیاسیدا.


ئامادەبوویێت هێژا،


هەر د ڤێ دەلیڤێدا، دەربارەی ڕەوشا ئالۆز یا ڕۆژهەتا ناڤین، من دڤێت تەئكیدێ لسەر هەلوێستا هەرێما كوردستانێ بكەم كو ئەم دگەل ڕاوەستیانا شەڕی و چارەسەركرنا ئاشتیانەینە‌ یا هەمی كێشە و ئاریشان. مە ب هیچ ڕەنگەكی نەڤێت هەرێما كوردستانێ و عێراق، بكەڤنە ناڤ ڤان ئالۆزییا. دڤێت هەمی هەول بێنە دان، داكو ڕەوش ئالۆزتر نەبێت.
ل دویماهیێ، سوپاس و پێزانین و دەستخۆشییەكا تایبەت بۆ مامۆستا و بەر‌پرسیار و ڕێڤەبەرێت كۆلێژا سەربازی یا دو یا زاخۆ. كار و خزمەت و ماندیبوونا وان، جهێ ڕێزەكا مەزنە. ئەركێ وان پیرۆزە و ڕۆلێ وان گەلەكێ گرنگە بۆ باشتركرن و بەرەڤپێشبرنا ئەركێ پێشمەرگەی، بۆ پێگەهاندنا نڤشەكێ وەلاتپارێز لسەر بنەمایێ زانستێت سەربازی و ئینتیما و ڤیانا وەلاتی.
ئەرك و خزمەتا كو هوین دكەن، ئاڤاكرنا كۆلێژ و ئەكادیمی یێت سەربازی، باشترین وەفادارییە بۆ خەبات و قوربانیدان و ڕۆلێ دیرۆكی یێ پێشمەرگا، بۆ هندێ دا پشتڕاست ببن كو پاشەڕۆژا پێشمەرگا دێ یا باشتر ‌بیت. 
سلاڤ و ڕێز و دروود بۆ گیانێ پاقژێ هەمی شەهیدا، ئەڤێت كو بۆ كوردستانێ خەبات كری و سەر دانای. سلاڤ بۆ شەهیدێت زندی، بۆ هەمی وانقەهرەمانێت كو د ئەركێ پاراستنا كوردستانیدا بریندار بووی. ئەم دبێژینە وان، خزمەتا وە  و خەباتا وە مە یا لبەر چاڤە.
هنگ قوتابی یێت خۆشتڤی، هەر سەركەفتی بن و هیڤییا من پاشەڕۆژەكا گەشە بۆ وە هەمیا و جارەكا دی پر ب دل پیرۆزباهییەكا گەرم ل وە هەمیا دكەم و سەركەفتی بن د ژیانا خۆدا.
زۆر سوپاس..