سەرۆک وەزیران داوای پێویستی هەڵوێستی کۆمەڵگەی نێودەوڵەتی دەکات لەبارەی دەستدرێژیەکانی ڕژێمی زایۆنی بۆ سەر غەززە و لوبنان

بەغدا-INA
ئەمڕۆ یەکشەممە"محەممەد شیاع سودانی"سەرۆك وەزیران،پێداگری کرد لەسەر پێویستی هەنگاونان بۆ کۆمەڵگەی نێودەوڵەتی سەبارەت بە دەستدرێژی زایۆنیەکان بۆ سەر غەززە و لوبنان. 
نووسینگەی ڕاگەیاندنی سەرۆک وەزیران، لە بەیاننامەیەکدا کە بۆ ئاژانسی هەواڵی عێراقی (INA) ناردوویەتی، تێیدا هاتووە : سەرۆک وەزیران پێشوازی لە "ستیڤن هیچن" باڵیۆزی بەریتانیا لە عێراق کرد.
وەک بەیاننامەکە ئاماژەی پێداوە : لە میانی دیدارێکدا سەرۆکوەزیران ،جەختی لە پێویستی هەوڵەکانی کۆمەڵگەی نێودەوڵەتی و ئەنجومەنی ئاسایشی نەتەوە یەکگرتووەکان کردوە بۆ ئەوەی ڕۆڵی سەرەکی خۆیان ببینن لە پاراستنی ئاسایش و سەقامگیری ناوچەکەو  ئەو پێشهاتانەی کە لە  ناوچەکەدا ڕوودەدەن،بەتایبەت دەستدرێژییەکانی ڕژێمی زایۆنی لەدژی غەززە و لوبنان،و بەئامانجگرتنی هاوڵاتیانی مەدەنی کە شەڕێکی جینۆسایدییە و  پێویستی بە ئیدانەکردن هەیە لەلایەن هەموو جیهانەوە، و پێویستی  ڕێزگرتن لە یاسا نێودەوڵەتییەکان و کە لەلایەن هیچ لایەنێکەوە پێشێل نەکرێت.
هەر بەگوێرەی بەیاننامەکە : لە میانی دیدارەکەدا  باس لە پێشکەوتنی پەیوەندییەکانی نێوان هەردوو وڵات و ڕێگاکانی پتەوکردنیان کرا، هەروەها دیاریکردنی وادەیەکی نوێ بۆ سەردانەکەی سەرۆك وەزیران  بۆ شانشینی یەکگرتوو، کە پێشتر بەهۆی پێشهاتەکانی ساڵی ڕابردوو  و دۆخی ناوچەکە دواخرابوو.