سەرۆكی حكومەت: ئایندەی نیشتمانەكەمان بەندە بە هەوڵ و كۆششی نەوەكانی داهاتوومان

هەولێر - INA
ئەمڕۆ یەكشەممە 6/2 بە ئامادەبوونی عەبدولەتیف رەشید سەرۆك كۆماری عێراق ، نێچیرڤان بارزانی سەرۆكی هەرێمی كوردستان، مەسرور بارزانی سەرۆكی حكومەتی هەرێمی كوردستان و دامەزرێنەر و سەرۆكی بۆردی ئەمیندارانی زانكۆی ئەمەریكی كوردستان لە دهۆك و سەرۆكی موحسین مەندەلاوی سەرۆكی ئەنجومەنی نوێنەرانی عێراق بە وەكالەت، ئاهەنگی دەرچوونی قوتابیانی زانكۆی ئەمەریكی كوردستان لە دهۆك بەڕێوەچوو.
لە ئاهەنگەكەدا مەسرور بارزانی دامەزرێنەر و سەرۆكی بۆردی ئەمیندارانی زانكۆی ئەمەریكی كوردستان لە دهۆك و سەرۆكی حكومەتی هەرێمی كوردستان ، گوتارێكی بە زمانی ئینگلیزی پێشكەش كرد و تێیدا جەختی لەوە كردەوە كە بەدرێژایی ئەم چەند ساڵە، زانكۆی ئەمەریكی كوردستان لە دهۆك بووەتە بەردی بناخەی تێڕوانینی ئێمە بۆ كوردستان وەك نەتەوەیەكی زانخواز و خاوەن زانست؛ شوێنێك بووە گەلی ئێمەی لەڕێگەی فێربوون و پەروەردەوە بە جیهان بەستووەتەوە.
ئەمەش دەقی وەرگێڕدراوی گوتارەكەیە:

بەڕێز د.عەبدولەتیف رەشید سەرۆك كۆماری عێراق،
بەڕێز كاك نێچیرڤان بارزانی سەرۆكی هەرێمی كوردستان،
بەڕێز موحسین مەندەلاوی سەرۆكی ئەنجومەنی نوێنەرانی عێراق بە وەكالەت ،
میوانانی هێژا ، ئەندامانی فاكەڵتی، خێزانە بەڕێزەكان، هاوڕێیان، دەرچووانی ساڵی 2024.
زۆر زۆر بەخێر بێن.
من زۆر خۆشحاڵم كە ئەمڕۆ لەگەڵ ئێوە بەشدارم لە ئاهەنگی دەرچووانی ژمارەیەكی دیكە لە قوتابیان , پیرۆزبایی لە دەرچووان دەكەم و هیوادارم لە هەموو قۆناخەكانی ژیانیان سەركەوتوو بن.
ئەمشەو شەوێكی وەرچەرخانە بۆ هەمووتان. بە تایبەت بۆ ئێوەی دەرچوو، ئەمە دەستپێك و خاڵی دواتری ئامانجەكەتانە. لەم ساتە بەدواوە، ئێوە داواتان لێدەكرێت لە جیهاندا بەرەو پێشەوە هەنگاو بنێن، ئەو بەهرانەی لە زانكۆ فێری بوون بەكاریان بهێنن. ئێوە دەچنە پاڵ ئەو 406 دەرچووە خۆشەویستانەی، لە دەیەی ڕابردوو كە بەم هۆڵانەدا تێپەڕیوون و بەردەوامن لە بەشداریكردن لە بازاڕی كاری بەهرەدار لە ناوخۆ و دەرەوە. من زۆر دڵخۆشم بەوەی ئەمە دەبێتە دەیەمین ساڵەی دامەزراندنی زانكۆی ئەمەریكی كوردستان. دەمەوێت سوپاس و پێزانینی خۆم ئاراستەی سەرۆكی هەرێمی كوردستان و هەموو ئەوانە بكەم، كە لە دەیەی رابردوودا پاڵپشتییەكی بێپایانی زانكۆی ئەمەریكی كوردستانیان كردووە.
بەدرێژایی ئەم چەند ساڵە، ئەم دامەزراوەیە، بووەتە بەردی بناخەی تێڕوانینی ئێمە بۆ كوردستان وەك نەتەوەیەكی زانستخواز و خاوەن زانست؛ شوێنێك بووە گەلی ئێمەی لەڕێگەی فێربوون و پەروەردەوە بە جیهان بەستووەتەوە، لە هەمانكاتیش لە ناوخۆ پەرەی بە گەشەسەندن و شارەزایی داوە و بەردەوامە. ئێمە نەك دەمانەوێت ئێوە سەركەوتوو بن، بەڵكو دەخوازین ببنە باشترین ئەو كەسانەی دەتوانن ببن ڕۆڵیان هەبێت لە خۆشگوزەرانی ئێمە لە داهاتوودا.
من وەك دامەزرێنەر و سەرۆكی زانكۆی ئەمریكی كوردستان، پێشبینی ئەوەم كرد، ئەم زانكۆیە ببێتە بەردی بناخەی گەشەی كۆمەڵایەتی و ئابووریمان، ببێتە دڵی كۆمەڵگەی دهۆك و كوردستان بە شێوەیەكی فراوانتر.
خۆشحاڵم بەوەی ئامانجەكەمان پێكاوە. دەرچووانی ئەم زانكۆیە ،داینەمۆی حكومەتەكەمانن و لە ناوچە هەستیارەكانی ناوخۆ و دەرەوەدا گەشە دەكەن. بە درێژایی هەوڵەكانمان بۆ یەكخستنی ئابووریمان لەگەڵ بازاڕە جیهانی و هەرێمییەكان، ژمارەیەكی زۆری دەرچووانی زانكۆی ئەمەریكی كوردستان دەبینین كە كەسایەتی و پێگەی خۆیان دروست دەكەن.
دەرچووان بەشێكی دانەبڕاون لە هەوڵەكانی ئێمە بۆ بنیاتنانی ئابووریی و داراییەكی نوێ. ئێمە لە كەرتی كشتوكاڵ دەرفەتی كارمان بۆ ئێوە هەیە، لەوێوە ڕێگە خۆشدەكەین بەرەو خۆبەردەوامی و خۆبژێویی و هەناردەكردن. ئێمە پێویستمان بە شارەزایی هەیە لە بواری بەڕێوەبردنی سەرچاوە سروشتییەكان، دارایی و دیپلۆماسیی و هەروەها لەو بوارانەی كە تابیەتن بەوەی چۆن بتوانین رووبەڕووی گۆڕانی خێرای كەشوهەوا بینەوە.
ئەگەر بەباشی كاربكەن و هەوڵ بدەن، رۆڵێك لە كوردستانی نوێ بەدەست دەهێنن، یان لەوانەیە لە دەرەوە زیاتر بەردەوامی بە پڕۆسەی خوێندنتان بدەن بە پشتبەستن بەم هەوڵانەی لێرە داوتانە. شانازیی دەكەین بەو كوڕ و كچانەمان لە دەرەوەن. ئامانجمان ئەوەیە، بارودۆخێكتان بۆ بڕەخسێنین بگەڕێنەوە نیشتمان و بەخۆشی بژین. ناوەندی ئەكادیمیمان لە زانكۆی ئەمەریكی كوردستان و هەر شوێنێكی دیكە هاندەدەم، هەوڵی زیاتر بدەن بۆ ئامادەكردنی دەرچووانمان بۆ بازاڕ و هێزی كار. دەبێت ئێمە كار بكەین بۆ ئەوەی خۆمان بگونجێنین لەگەڵ خواست و دەرفەتی نوێ لە هێزی كاردا.
پڕۆگرامەكانی بەرەوپێشبردن و ئەو كۆرسانەی فێركردن، پەیوەندیدارن بە پێداویستییەكانمان، وەك ئابووری نوێ، خوێندن و پەروەردە، كشتوكاڵ و جیهانی سەرسوڕهێنەری زیرەكیی دەستكرد، ئەم بوارانە زۆر گرنگن.
پێویستە پڕۆگرامەكانی خوێندن ڕەنگدانەوەی خواستەكانی جیهان بن. سەبارەت بەمە، چەند سەرنج و تێبینییەكم هەیە و دەمەوێت بیانخەمە ڕوو، ئەوانیش پەیوەندیدارن بە دۆخی داهاتووی ژیانمانەوە.
لەكاتێكدا هیچ كام لە ئێمە نازانێت لە چەند ساڵی داهاتوو، زیرەكیی دەستكرد بەرەو كوێمان دەبات، هەموومان هەستێكمان لەلا دروستبووە، كە زیرەكیی دەستكرد لەكوێوە ئێمەی گەیاندووەتە ئێستا. ئەو زانیاریی و ئەپڵیكەیشنانەی ئێستا بەردەستن، زۆر لەوە زیاتر ئەنجامدەدەن، كە مرۆڤایەتی لە رابردوو ئەنجامیداوە و دروستیكردووە. لەكاتێكدا بەرنامەكانی زیرەكیی دەستكرد بە بەڕێوەبردنی ئەركەكان، خشتە و پەیوەندیكردن، ژیانی رۆژانەمان ئاسان دەكەن، لەگەڵ ئەوەشدا رێگریی لە دەربڕینی راستەقینە و بەهرەكانی پەیوەندیكردنمان دەكەن. لە نووسینی ئیمەیلەوە بۆ ئەگەری دزەكردن بە نووسینی ئەكادیمی، زیرەكیی دەستكرد چەندین ئاڵنگاریی دروستدەكات، ئەوەش ەكرێ ببێتە هۆی ئەوەی توانای دەربڕینی بیرۆكەكانمان بەشێوەیەكی روون و دروست لاواز بكات. ئەمەش بووەتە جێگەی نیگەرانی لە شوێنی كار و دامەزراوەكان. بۆ ڕووبەڕووبوونەوەی ئەمە، دەبێت هێزی دەنگی خۆمان، بیرۆكەكانمان، هزر و دیدگە و تێگەیشتنمان گەشە پێ بدەین، ئەوانەش لە هاندانی گوتاری مانادار و گەشەسەندن، جێگرەوەیان نییە.
ڕاستە ئێستا دەستڕاگەیشتن و پەیوەندیكردن بە زیرەكیی دەستكرد، گونجاو و ئاسایی دێتە بەرچاو، بەڵام نابێت لە بیرمان بچێت كە زیرەكیی هەست و نەستی مرۆڤ، هەمیشە بناخەی پەیوەندیی رەسەن و پێشكەوتنی زانست دەبێت. رێگە مەدەن تەكنەلۆژیا دەنگی بێوێنەتان بێدەنگ بكات ، بەرەو پێشەوە بڕۆن و بە متمانەوە پەیوەندیی بكەن و قسە بكەن، هەروەك هزر و تێگەیشتنەكانتان لەڕێگەی پەروەردە و ئەزموونەوە بەهێز دەكرێن، ئەوە ئەو شتەیە كە جیات دەكاتەوە و هەمیشە لە بیرۆكە دروستكراوەكانی ئامێرێك بەنرختر دەبن. ئەم جیهانەی خێرا گەشە دەكات، ئەوانەی لەگەڵ پێشكەوتنی ئەم جۆرە تەكنەلۆژیایە گەورە نەبوون، بەجێدەمێنن.
دەرچووان هاندەدەم هاوكاریی ئەندامانی خێزانەكانتان بكەن و لەگەڵ ئەم جیهانە نوێیە رایان بهێنن. زانكۆی ئەمەریكی كوردستان هاندەدەم ڕەچاوی ئەو پڕۆگرامانە بكەن بۆ هەركەسێك بیەوێت زیاتر بزانێت. ئەگەر كات بۆ پەروەردەكردنی هەموو ئاستەكانی كۆمەڵگەكانمان تەرخان بكەین، نابێت تەكنەلۆژیا ببێتە رێگر. ئەو ئابوورییە نوێیەی بنیاتی دەنێین، پێویستی بە شێوەیەكی جیاواز لە بەشداریكردنی هاووڵاتیانمان هەیە، من داوا دەكەم هەموو كوردستانییەك، بە تایبەتی بەتەمەنەكانمان،پشتیوانییان بكرێت بۆ خۆگونجاندن لەگەڵ تەكنەلۆژیای نوێ. سیستمی بانكیی دیجیتاڵی بە تایبەتیی، توانای شۆڕشكردنی هەیە لە چۆنیەتی هەڵگرتن و گواستنەوەی داراییمان. داوا لە قوتابیان دەكەم، چۆن لێرە فێربوون، بەو شێوەیەش كات تەرخانبكەن بۆ فێركردنی ئەندامانی خێزانەكانیان. ئێمە هەموو پێكەوە لەم گەشتەداین و ناكرێت هیچ كەس لەدواوە جێبمێنێت.
بەدرێژایی مێژووە كورتەكەی، زانكۆی ئەمەریكی كوردستان، چرای فرەچەشنی و تێكەڵبوون بووە، شانازی دەكەم بەوەی بڵێم، 72 لەسەدی قوتابیانی ئێرە لە چەند جۆرێك لە سكۆلەرشیپ سوودمەند بوون. باوەڕم بەوەیە، توانای خوێندن و پەروەردە ژیان بگۆڕێت. ئێمە پابەندین بەوەی دەرفەت بۆ هەمووان بڕەخسێنین، بێ گوێدانە پێشینە و باكگراوند. بەدواداچوونی بەردەواممان بۆ متمانەبەخشینی ئەمەریكا، جەخت لە پابەندیمان دەكاتەوە بۆ دڵنیایی كوالێتی و بەرەوپێشبردنی بەردەوام.
وەك یەكەم دامەزراوە لە وڵاتدا بۆ گەڕان بەدوای ئەم دانپێدانانە شكۆدارەدا، ئێوە توانای ئەوەتان دەبێت داهاتوو بنەخشێنن و بەردەوام گۆڕانكاریی دروستبكەن.
بۆ دەرچووانی 2024، بەرەوپێشەوە هەنگاو بنێن و ئەو دەرفەتانە بقۆزنەوە كە ئەم زانكۆیە بۆی ڕەخساندوون. شانازیی بكەن بەوەی لێرە بەدەستتان هێناوە، شانازی بكەن بەوەی ئێوە كێن. وەك كوڕ و كچانی ئەم نیشتمانە، هەرگیز لەیادی نەكەن لەكوێوە هاتوون و هەرگیز خۆتان بە كەم مەزانن. هانتان دەدەم لەسەر بەهاكانتان بژین، هاوكاریمان بكەن بۆ رابەرایەتیكردنی هەوڵەكان بۆ گۆڕانكاریی لە بوارە گرنگەكان.
داهاتووی نیشتمانەكەمان و بوونی هەسارەكەمان لە دەستی نەوەی ئێوە دەبێت. لەوانەیە ئەمە بەرپرسیاریەتییەكی قورس بێت، هەر واش دەبێت. بەڵام هانی هەمووتان دەدەم، لەبەرامبەر ئاڵنگارییەكان هەمیشە ئامادە بن و جیاوازیی دروستبكەن. خوێندن و پەروەردەكەتان بەكاربهێنن بۆ گۆڕانكاریی ئەرێنی، بۆ داهێنان و نوێگەریی، بۆ رابەرایەتیكردن بە دڵسۆزیی و دەستپاكییەوە.
دەرچووانی 2024 : جارێكی دیكە پیرۆزباییتان لێ دەكەم. ئێمە بەپەرۆشین بۆ ئەوەی بزانین داهاتوومان چۆن دەبێت. بە باوەڕ و متمانەوە بەرەو پێشەوە بڕۆن، پابەند بن بەوەی جیهان بكەن بە شوێنێكی باشتر.
سوپاس.