سەرۆكی حكومەتی هەرێم پێشوازی لە باڵیۆزی ڤاتیكان لە عێراق دەكات

سیاسی

15-05-2024, 16:57

+A -A

هەولێر - INA
ئەمڕۆ چوارشەممە، سەرۆكی حكومەتی هەرێمی كوردستان مەسرور بارزانی، پێشوازی لە باڵیۆزی ڤاتیكان لە عێراق میتیا لێسكۆڤار كرد، كە بە مەبەستی ماڵئاوایی و كۆتایهاتنی ئەركەكەی سەردانی كردبوو.
نوسینگەی راگەیاندنی سەرۆكی حكومەتی هەرێم لە راگەیەنراوێكدا كە بۆ ئاژانسی هەاڵی عێراقی ناردووە، دەڵێت: لە كۆبوونەوەكەدا باڵیۆزی ڤاتیكان سوپاسی لایەنە پەیوەندیدارەكانی حكومەتی هەرێمی كوردستانی كرد، بۆ پێشكەشكردنی كارئاسانی و هاوئاهەنگیكردن لەگەڵ باڵیۆزخانە و هاریكاریكردنی لە پێناو سەرخستنی ئەركەكەی.
باڵیۆزی ڤاتیكان هەروەها ڕۆڵی حكومەتی هەرێمی كوردستانی لە پاراستن و داكۆكیكردن لە مافەكانی گشت پێكهاتەكان و بەتایبەتی كریستیانەكانی هەرێم بەرز نرخاند.
هاوكات سەرۆكی حكومەتی هەرێم جەختی لە پەرەپێدانی كولتووری بەیەكەوەژیانی ئاشتییانەی پێكهاتەكان كردەوە و پابەندبوونی هەرێمی كوردستانی بە پاراستنی مافی پێكهاتەكان دووپات كردەوە.
هەروەها سوپاسی باڵیۆزی كرد بۆ هەوڵ و كاركردنی لە پێناو بەهێزكردنی پەیوەندیی دوولایەنە و هیوای سەركەوتنیشی بۆ خواست لە ئەركی داهاتوویدا.