سەرۆكی حكومەتی هەرێم پێشوازی لە نوێنەری تایبەتی سكرتێری گشتیی نەتەوەیەكگرتووەكان دەكات

هەلێر - INA
ئەمڕۆ پێنچشەممە، مەسرور بارزانی سەرۆكی حكومەتی هەرێمی كوردستان، پێشوازی لە ڤیرجینیا گامبا، نوێنەری تایبەتی سكرتێری گشتیی نەتەوە یەكگرتوەكان بۆ كاروباری منداڵان و ململانێی چەكداری كرد.
نوسینگەی راگەیاندنی سەرۆكی حكومەتی هەرێم، لە راگەیەنراوێكدا كە بۆ ئاژانسی هەواڵی عێراقی ناردوە، دەڵێت: مەسرور بارزانی سەرۆكی حكومەتی هەرێمی كوردستان، پێشوازی لە ڤیرجینیا گامبا، نوێنەری تایبەتی سكرتێری گشتیی نەتەوە یەكگرتوەكان بۆ كاروباری منداڵان و ململانێی چەكداری كرد.
لە كۆبوونەوەكەدا نوێنەری تایبەتی سكرتێری گشتیی نەتەوە یەكگرتوەكان، كورتەیەكی لەبارەی كار و چالاكییەكانیان و ئامانجی سەردانەكەیان بۆ عێراق و هەرێمی كوردستان خستە ڕوو. ستایشی هەوڵ و ڕێكار و پلانەكانی حكومەتی هەرێمی كوردستانیشی كرد لە بواری پاراستنی مافەكانی منداڵان، خۆشحاڵیی خۆشی نیشاندا كە سەرۆكی حكومەتی هەرێم تێگەیشتنێكی باشی لەبارەی گرنگیی پاراستنی مافەكانی منداڵان و ئەرك و ئامانجەكانی نەتەوە یەكگرتووەكان تایبەت بەم بوارە هەیە.
لەبەرامبەردا سەرۆكی حكومەتی هەرێم ئامادەیی تەواوی حكومەتی هەرێمی كوردستانی بۆ هاریكاری و هەماهەنگیكردن و ئەنجامدانی پڕۆژەی هاوبەش لەگەڵ نەتەوە یەكگرتووەكان تایبەت بە پاراستنی مافەكانی منداڵان دەربڕی.