سەرۆكایەتی كۆمار رەتیدەكاتەوە شەقامێك بە بڕی 450 ملیۆن دینار لە ناوچەی سەوز جێبەجێ بكات

بەغداد  - INA
ئەمڕۆ پێنجشەممە، سەرۆكایەتی كۆمار رەتیكردەوە: شەقامێك لە ناوچەی سەوز بە بڕی 450 ملیۆن دیناری عێراقی جێبەجێ بكات.
فەرمانگەی راگەیاندنی سەرۆكایەتی كۆمار لە بەیاننامەیەكدا بۆ ئاژانسی هەواڵی عێراقی ناردووە، دەڵێت: هەندێك پەیج لە تۆڕە كۆمەڵایەتییەكان كە مەرامیان چەواشەكردنی ڕای گشتی و شێواندنی ڕاستییەكانە، هەواڵێكی سەر لەبەر نادروستیان  بڵاوكردۆتەوە كە گوایە سەرۆكایەتی كۆمار پرۆژەی نۆژەنكردنەوەی شەقامێكی لە ناوچەی سەوزی بەغداد بە بڕی 450 ملیۆن دیناری عێراقی جێبەجێكردوە .
لەم بارەیەوە دوپاتیدەكەینەوە: كە سەرۆكایەتی كۆمار هیچ پەیوەندییەكی بەو بابەتەوە نیە و  ئەو شەقامەی نۆژەن نەكردۆتەوە و تەنانەت هیچ نۆژەنكردنەوەیەكیشی لە كۆشكی بەغداد نەكردووە لە ناوچەی سەوز، ئەو شەقامەیش كە بەرەو كۆشكی سەلام دەڕوات لەلایەن ئەمانەی بەغداوە نۆژەنكراوەتەوە.
 هەر لە بەیاننامەكەدا هاتووە، لێرەوە ڕایدەگەیەنین كە سەرۆكایەتی كۆمار دەرگاكانی واڵان بەڕووی گشت لایەنە پەیوەندیدارەكان بۆ بەدواداچونی ئەم بابەتە، هاوكات سەرۆكایەتی كۆمار رێوشوێنی یاسایی پێویست دەگرێتەبەر بەرامبەر ئەو كەس و لایەنانەی كە زیانی مەعنەویان بە پێگەی سەرۆكایەتی كۆمار گەیاندوە و ڕووبەڕووی دادگاییان دەكاتەوە، چونكە لەم  جۆرە هەواڵی نادروست و ناڕاستیانە نەك  تەنها زیان بە ناوبانگی دامەزراوەی سەرۆكایەتی دەگەیەنێت، بەڵكو هەوڵیش دەدەن متمانە بە دامەزراوەكانی دەوڵەت و سەرۆكایەتییەكانی لاواز بكەن.