دارایی پەرلەمان سوپاسی سەرۆك وەزیران دەكات بۆ هەوڵە گەورەكانی لە بەدواداچوونی مافیاكانی قاچاخچێتی دراو

سیاسی

3-08-2023, 17:43

+A -A

بەغداد - INA

لیژنەی دارایی ئەنجومەنی نوێنەران، ئەمڕۆ پێنجشەممە، سوپاسی محەمەد شیاع سودانی سەرۆك وەزیرانی كرد بۆ هەوڵە گەورەكانی لە بەدواداچوون مافیاكانی قاچاخچێتی دراو.

لیژنەكە لە بەیاننامەیەكدا كە بۆ ئاژانسی هەواڵی عێراقی ناردووە، رایگەیاند: دوای بەرزبوونەوەی نرخی دۆلار لە بازاڕەكان و كاریگەری لەسەر ژیانی هاوڵاتیان و دۆخی ئابووری، لیژنەی دارایی كۆمەڵێك ڕێكاری گرتەبەر، لەوانە میوانداریكردنی پارێزگاری بانكی ناوەندی و پەیوەندیكردن لەگەڵ سەرۆك وەزیران و تیمی قەیرانەكان و پەیوەندی ڕۆژانە لەگەڵ لایەنە پەیوەندیدارەكان.

لیژنەكە پێزانین و سوپاسگوزاری خۆی بۆ سەرۆك وەزیران و دەزگای ئاسایشی نیشتمانی و شانەی قەیرانەكان دەربڕی بۆ هەوڵە گەورەكانیان لە بەدواداچوونی مافیاكانی قاچاخچێتی دراو و دەستگیركردنی قاچاخچییە گەورەكانی دراو، هەروەها ستایشی هاوكاری حكومەتی هەرێمی كرد لە دەستگیركردنی هەندێك لە قاچاخچییەكان لە هەرێم.

هەروەها داوای كرد ڕێگری لە دەستوەردانی بەشێك لە بەرپرسان و سیاسەتمەدارەكان بكرێت كە هەوڵی دەستوەردان لە بەرژەوەندی قاچاخچییەكان دەدەن، و دواتر بەیاننامەیەكی ورد لەبارەی سەرجەم ڕێكارەكانی لیژنەی دارایی لەسەر ئەم بابەتە بڵاودەكرێتەوە.