سه‌رۆكى هه‌رێمى كوردستان له‌گه‌ڵ وه‌زيرى به‌رگريى ئيتاليا كۆبووه‌وه
سیاسی
- 3-05-2023, 16:35
هەولێر/INA
ئەمڕۆ ڕۆژی چوارشەممە،نێچیرڤان بارزانی سەرۆکی هەرێمی کوردستان لەگەڵ وەزیری دەرەوەی ئیتالیا کۆبووەوە،
نووسینگەی ڕاگەیاندنی سەرۆکی هەرێمی کوردستان لە بەیانامەیێک دا کە کۆپیەکی بۆ ئاژانسی هەواڵی عێراقی ناردووە ڕایگەیاندووە،نيوه‌ڕۆى ئه‌مڕۆ چوارشه‌ممه نێچيرڤان بارزانى، سه‌رۆكى هه‌رێمى كوردستان، پێشوازى له گویدۆ کرۆسێتۆ وەزیری بەرگریی ئیتالیا کرد.
له كۆبوونه‌وه‌يه‌كدا بره‌ودان به په‌يوه‌ندييه‌كانى ئيتاليا له‌گه‌ڵ عێراق و هه‌رێمى كوردستان، دوايين سه‌ردانى سه‌رۆك نێچيرڤان بارزانى بۆ ڕۆما، دۆخى سياسيى عێراق و په‌يوه‌ندييه‌كانى هه‌ولێر ـ به‌غدا، ڕۆڵى ئيتاليا له هاوپه‌يمانيى نێوده‌وڵه‌تيى دژى داعش و دوايين پێشهاته‌كانى به‌ره‌نگاربوونه‌وه‌ى تيرۆر، تاوتوێ كران.
نێچيرڤان بارزانى سوپاس و پێزانينى هه‌رێمى كوردستانى بۆ ڕۆڵ و پشتگيريى سه‌ربازيى ئيتاليا له عێراق و هه‌رێمى كوردستان له شه‌ڕى دژى داعشدا دووپات كرده‌وه و خواستى هه‌رێمى كوردستانى بۆ بره‌ودان بە په‌يوه‌ندييه‌كانى له‌گه‌ڵ ئيتاليا ده‌ربڕى، به‌تايبه‌تيش فراوانكردنى هاريكاريى هاوبه‌ش له بوارى ئه‌منيدا. به‌ڕێزيان هه‌روه‌ها سوپاسى ڕۆڵى هێزه‌كانى ئيتالياى له هه‌رێمى كوردستان كرد بۆ مه‌شق و ڕاهێنانيان به پێشمه‌رگه.
لاى خۆيه‌وه وه‌زيرى به‌رگريى ئيتاليا وێڕاى ده‌ربڕينى به‌رده‌واميى پشتگيريى سه‌ربازيى وڵاته‌كه‌ى بۆ عێراق و هه‌رێمى كوردستان و پێزانينى ئيتاليا بۆ ڕۆڵى هه‌رێمى كوردستان له تێكشكاندنى داعشدا، دووپاتى كرده‌وه كه وڵاته‌كه‌ى به بايه‌خه‌وه له په‌يوه‌ندييه‌كانى له‌گه‌ڵ عێراق و هه‌رێمى كوردستان ده‌ڕوانێت و ئارامى و سه‌قامگيريى هه‌رێمى كوردستان و عێراقى به گرنگ بۆ ناوچه‌كه و جيهان له قه‌ڵه‌م دا.
چه‌ند پرسێكى جێى بايه‌خى هاوبه‌ش، لێكه‌وته‌كانى شه‌ڕ له ئۆكراينا و دوايين پێشهاته‌كانى ناوچه‌كه به‌گشتى، ته‌وه‌رێكى ديكه‌ى كۆبوونه‌كه بوو كه تيايدا باڵيۆزى ئيتاليا له عێراق، كونسولى گشتى و فه‌رمانده‌ى هێزه‌كانى ئيتاليا له هه‌رێمى كوردستان ئاماده‌ى بوون
