شەقامەكانی دەوروبەری قەڵا هاتوچۆی ئۆتۆمبێل تێیدا قەدەغە دەكرێت
ناوخۆ
- 22-02-2023, 19:08
هەولێر -INA
وەزارەتی شارەوانی حكومەتی هەرێمی كوردستان رایگەیاند، بەمەبەستی چارەسەركردنی قەرەباڵغی شەقامەكان و برەودان بە جوانی سیمای شارستانی قەڵای هەولێر، بڕیاردرا جارێكی دیكە شەقام و بازاڕەكانی دەوروبەری قەڵا رێكبخرێتەوە.
وەزارەتی شارەوانی و گەشتوگوزاری هەرێمی كوردستان لە راگەیندراوێكدا كە دەستی ئاژانسی هەواڵی عێراقی كەوت تێیدا ئاماژەی بەوە كردووە :" ئەمڕۆ لە كۆبوونەوەیەكدا بڕیاردرا هەندێك لە شەقامەكانی دەوروبەری قەڵا بكرێنە شەقامی پیادە و هاتوچۆی ئۆتۆمبێل تێیدا قەدەغە دەكرێت ".
هەروەها ئەوەیش هاتووە:" دوكانەكانی موڵكی شارەوانی جارێكی تر ڕێكدەخرێنەوە كە سیمایەكی شارستانی بدات و بایەخێكی زۆرتر بە لایەنی ژینگەپارێزی و پاكوخاوێنی دەدرێت، هەروەها رەچاوی باری تەندروستیی هەموو تەمەن و توێژە جیاوازەكان دەكرێت ".
لە راگەیەندراوەكەدا ئەوەش هاتووە:" بڕیاردرا لە ماوەی هەفتەیەكدا هەموو تێبینییەكان ئامادە بكرێت و هەموو لایەنەكانی پەیوەست بەم رێكخستنەوەیە واژووی لەسەر بكەن و بچێتە بواری جێبەجێكردنەوە ".
