نێچیرڤان بارزانی بەردی بناغەی پەیمانگه‌يه‌كى كولتووريی فەرەنسی ـ ئەڵمانی دادەنێت
سیاسی
- 22-01-2023, 17:06
هەولێر_INA
سەرۆكی هەرێمی کوردستان نێچیرڤان بارزانی بەردی بناغەی پەیمانگه‌يه‌كى كولتووريی فەرەنسی ـ ئەڵمانی لە هەولێر دادەنێت.
نووسینگەی ڕاگەیاندنی سەرۆکی هەرێمی کوردستان لە بەیانامەیێک دا کە کۆپیەکی بۆ ئاژانسی هەواڵی عێراقی (INA) ناردووە ڕایگەیاند ،پاشنیوەڕۆی ئەمڕۆ یەكشەممە 22/1/2023 نێچیرڤان بارزانی سەرۆكی هەرێمی كوردستان، لەگەڵ هەریەك لە ئيريك شۆڤاليێ باڵيۆزى فه‌ره‌نسا و مارتين يێگه‌ر باڵيۆزى ئه‌ڵمانيا له عێراق و كونسوڵانی هەردوو وڵات لە هەولێر و ژمارەیەك وەزیر و بەرپرسانی حكوومەتی هەرێمی كوردستان، لەسەر قەڵای هەولێر بەردی بناغەی په‌يمانگه‌ى داهاتووى كولتووريى هاوبه‌شى فه‌ره‌نسى ـ ئه‌ڵمانى دانا كه لە ڕێوڕسمێكى ڕه‌مزيدا به‌ڕێوه‌چوو.
لە ڕێوڕەسمەكەدا سەرۆك نێچیرڤان بارزانی وتەیەكی پێشكەش كرد، ئەمە دەقەكەیەتی:
هەموو لایەكتان بە خێر بێن. خۆشحاڵم كە ئەمڕۆ بەشداری دەكەم لە دانانی بەردی بناغەی ئەنستیتوی كولتووری كە كارێكی هاوبەشی نێوان ئەڵمانیا و فەرەنسایە. سوپاسی هەردوو وڵاتی ئەڵمانیا و فەرەنسا دەكەین بۆ هەموو ئەو پشتگیرییانەی كە لە هەرێمی كوردستان و عێراقیان كردووە.
بێگومان سەفین دزەیی ئەو شتەی كە پێویست بوو لەسەر هەڵوێستی هەرێمی كوردستان هەمووی بە ووردەكارییەوە باس كرد. ئەوەی دەمەوێ زیادی بكەم ئەوەیە كە بێگومان ئەم پەیمانگەیە دەبێتە پردێكی دیكەی دۆستایەتيی نێوان هەرێمی كوردستان و ئەڵمانیا و فەرەنسا. ئەم دوو وڵاتە لە كاتی تەنگانەدا بە هەموو شێوەیەك یارمەتیی هەرێمی كوردستانیان داوە، چ لە ڕووی سەربازییەوە، چ لە ڕووی كولتوورییەوە و چ لە ڕووی مرۆییيەوە.
ئەمڕۆ بەم بۆنە گەورەیەوە كە پێموایە بۆنەیەكی زۆر زۆر گەورەیە و كارێكی زۆر گرنگە، چونكە ئەمە پەیوەندیی كولتووریی هەردوولامان بەهێز دەكات، سوپاسیان دەكەین بۆ هەموو ئەو هاوكارییانەیان و هیوادارین ئەم هاوكارییانەیان لەگەڵ هەرێمی كوردستان و عێراق بەردەوام بێت. سوپاسی تیمی هەردوولا دەكەین ئەوانەی كە لە پاریسەوە تەشریفیان هێناوە و ئەوانەی كە لە بەرلینەوە هاتوونەتە هەولێر و لەگەڵ ئێمە بەشدارن.
سوپاسی باڵیۆزی فەرەنسا و باڵیۆزی ئەڵمانیا لە بەغدا دەكەین و سوپاسی جەنابی كونسوڵی فەرەنسا و كونسوڵی ئەڵمانیا لە هەولێر دەكەین بۆ بەشداريی ئەم ڕێورەسمە و هیوادارم ئەم ئەنستیتۆیە ببێتە پردێكی دیكەی هاوكاریی كولتووریی نێوان هەرێمی كوردستان و فەرەنسا و ئەڵمانیا.
ئەمە ڕووداوێكی گرنگە چونكە وەك لە جەنابی باڵیۆزی فەرەنسا بیستم ئەمە چوارەمین كارە بەم شێوەیە ئەنجامی دەدەن. پێشتر سێیان ئەنجام داوە و هەولێر چوارەمینە، هەروەها ئەوەی لە هەولێر دەكرێت لە شوێنێكی زۆر گرنگدا كراوە كە قەڵای دێرینی هەولێرە، ئەمەش نیشانەیەكی زۆر زۆر گرنگی ئەو پەیوەندییە كولتووری و هاوبەشییەيه كە لەگەڵ فەرەنسا و ئەڵمانیا هەمانە.
دووبارە سوپاسیان دەكەین و هەموو لایەك زۆر بەخێر بێن. زۆر سوپاس
