سەرۆك كۆمار چاو بە واقیعی خزمەتگوزاری پارێزگای بەسرەدا دەخشێنێتەوەو بەڵێنی چارەسەركردنی كێشەكان دەدات

بەغداد - INA
سەرۆك كۆمار عەبدوللەتیف جەمال ڕەشید ئەمرۆ چوارشەممە، چاودێری واقیعی خزمەتگوزاری پارێزگای بەسرەی كرد و هاوكات بەڵێنی چارەسەركردنی گرفتەكانی دا.
سەرۆكایەتی كۆمار لە بەیاننامەیەكدا كە دەست ئاژانسی هەواڵی عێراقی كەوتووە، دەڵێت: سەرۆك كۆمار عەبدوللەتیف جەمال رەشید  ئەمرۆ  چوارشەممە بەسەرۆكایەتی وەفدێكی باڵای وزاری بۆ بینینی دۆخی راستەقینە و پێداویستییەكانی  پارێزگای بەسرە، سەردانی شارەكەی كرد.
ئاشكراشیكرد:  لەو چوارچێوەیەدا، سەرۆك كۆمار سەردانی بینای پارێزگای بەسرەی كرد و چاویكەوت بە ئەسعەد عیدانی پارێزگار و ئەندامانی ئەنجومەنی خۆجێی.  
رونیشیكردەوە: سەرۆك كۆمار  گوێی لە ڕوونكردنەوەیەكی وردی پارێزگار گرت سەبارەت بە دۆخی گشتی پارێزگاكە و ئەو ئاستەنگانەی كە پێشكەوتن و دۆخی ئاستی خزمەتگوزاری و ئەمنی و ئابووری دوادەخەن.
ئاشكراشیكرد: دوای ئەوە سەرۆك كۆمار لەگەڵا ژمارەیەك لە كەسایەتی دیاری عەشایەری پارێزگا و كەسایەتییەكان و بەڕێوەبەرانی ناحیە و بەشە خزمەتگوزارییەكانی پارێزگاكە كۆبووەوە، كە تیایدا ئامادەبووان بەخێرهاتنی سەرۆك كۆماریان كرد، سوپاس و پێزانینی خۆیان بۆ گرنگیدانی سەرۆك كۆمار بە شاری بەسرە و دانیشتوانەكەی نیشاندا، هەروەها وردەكارییان سەبارەت بە كۆمەڵێك بابەتی پەیوەست بە خزمەتگوزاری و گوزەران و بارودۆخی ئەمنی پارێزگای بەسرە و دانیشتوانەكەی خستەروو.
 دواتر سەرۆك كۆمار لە وتارێكدا لە میانی دیدارەكەدا خۆشحاڵی خۆی دەربڕی كە سەردانی بەسرەی كردوە و دیداری لەگەڵ دانیشتوان و لێپرسراوانی شارەكە سازكردوە لە پێناو گوێگرتن لێیان و كاركردن بۆ پەرەپێدانی شارەكە و چارەسەركردنی كێشەكانی، ئاماژەی بەوەدا بەرنامەی كاری حكومەت لە خەمی چارەسەركردنی كێشەی هاوڵاتیانە لە هەموو پارێزگاكان، هەروەها باشتركردنی بارودۆخی ژیان و خزمەتگوزاری و چەسپاندنی ئاسایش و سەقامگیرییە.
سەرۆك كۆمار ئاماژەی بەوەشكرد، بەسرە پێگەیەكی بەنرخی لە دڵی عێراقییەكاندا هەیە، جێگەی سەرنجی حكومەتی عێراق و چالاكی سیاسیی و هێزە نیشتیمانییەكانە، تەئكیدیشیكردەوە: كە پێویستە دەزگاو دامەزراوەكانی دەوڵەتی دەستوری كار بۆ پێشخستنی بەسرە و باشتركردنی دۆخی ژینگەیی بكەن و بارودۆخی ئابووری و خزمەتگوزاری و پەروەردەیی باشتر بكەن و قەرەبووی ئەو شارەكە بكەنەوە كە لە ماوەی دەیەكانی ڕابردوودا پشت گوێخراوە.
سەرۆك كۆمار جەختیكردەوە لەسەر پێویستی چەسپاندنی ئۆقرەیی و سەقامگیریی دۆخی ئەمنی و سیاسی پارێزگاكە لە پێناو رێگەخۆشكردن و  هاندانی جوڵەی وەبەرهێنان و كەرتی تایبەت، رایگەیاند: بەسرە پایتەختی ئابووری عێراقە، چونكە هەموو بنەماكانی ئابوری لەخۆدەگرێت، بەهۆی هەڵكەوتە جوگرافییەكەی و سەرچاوەی مرۆیی و سەرچاوەكانی نەوت، هەروەها تایبەتمەندی خۆی هەیە بەو پێیەی تاكە دەروازەی عێراقە لەسەر دەریا، هەروەها جوانی شارەكە، لە ڕابردوودا وەك شاری ڤێنیس لە خۆرهەڵاتی ناوەڕاست وەصفكراوە.
لە درێژەی قسەكانیدا ، سەرۆك كۆمار  تەئكیدیكردەوە لەسەر گرنگی كاری جددی بۆ پەرەپێدانی بەسرە لە رووی ژێرخانەوە و ئاماژەیدا كە پێویستە بە پێی قۆناغی ئێستا و وەبەرهێنانی گونجاو و هەروەها بە هۆی بەرزبوونەوەی نرخی نەوت، پێداچونەوە بە قانونی وەبەرهێناندا بكرێت و لە زووترین كاتدا هەموار بكرێتەوە تاكو رۆڵی  هەبێت بۆ دۆزینەوەی جێگرەوەیەكی ئابووری بەردەوام.
سەرۆك كۆمار داوای لە هەمووان كرد بە پەرۆش و دڵسۆزانە كاربكەن بۆ پێشكەوتنی عێراق لەرێگەی  بوژاندنەوەی بواری كشتوكاڵ و چارەسەركردنی كێشەی بەفیڕۆدانی ئاو و بەكارهێنانی بە شێوازێكی ئاودێری هاوچەرخ و پابەندبوون بە مەترسی قەیرانی ئاو و راگرتنی زیادەڕۆیی لەسەر ڕووبارەكان و پاككردنەوە و پاراستنی ئاودێری كەناڵەكان، بە ئاماژەدان بە گرنگی گفتوگۆ لەگەڵ وڵاتانی دراوسێ بۆ گەیشتن بە لێكتێگەیشتنێك كە زامنی كۆتایی بدات بە پشكی دادپەروەرانەی ئاو بۆ عێراق و نەوەكانی داهاتومان.
هەروەها سەرۆك كۆمار پیرۆزبایی كرد كە بەسرە میوانداری بیست و پێنجەمین پاڵەوانێتی تۆپی پێی كەنداو دەكات لە سەرەتای ساڵی داهاتوو، بەو هیوایەی ئەو پاڵەوانێتییەی كە برایان لەسەر خاكی عێراق كۆدەكاتەوە، مژدەیەكی خۆش بێت بۆ عێراق.