كازمی و بارزانی باس له‌داواپێشهاته ئه‌منی و به‌ئامانجگرتنی ناوچه‌كانی هه‌رێمی كوردستان ده‌كه‌ن
سیاسی
- 3-10-2022, 14:58
ئه‌مڕۆ دووشه‌ممه 2022/10/3 مسته‌فا كازمى سه‌رۆك وه‌زيران له‌گه‌ڵ نێچیرڤان بارزانی سه‌رۆكی هه‌رێمی كوردستان كۆبووه.
نوسینگه‌ی سه‌رۆك وه‌زیران له‌راگه‌یندراوێكدا كه‌بۆ ئاژانسی هه‌واڵی عێراقی ناردووه راگه‌یاند" له ديدارێكدا دوايين پێشهاته‌كانى پرۆسه‌ى سياسيى عێراق و هه‌وڵه‌كانى حكوومه‌تى فيدراڵى عێراق و هه‌رێمى كوردستان بۆ لێكنزيككردنه‌وه‌ى لايه‌نه سياسييه‌كان و پاراستنى ئاشتيى ناوخۆيى، تاوتوێ كران و داكۆكييان له‌وه كرده‌وه كه گفتوگۆ تاكه ڕێگه‌يه بۆ گه‌يشتن به چاره‌سه‌رى كێشه‌كان.
هه‌ردوولا جه‌ختيان كرده‌وه كه كه خوێن و گيانى هاووڵاتييان و پاراستنى خۆپيشانده‌ران له هه‌موو عێراق، هه‌روه‌ها پاراستنى ماڵ و سامانى تايبه‌ت و گشتى، خواست و ئامانجى هاوبه‌شن و هه‌مووان ده‌بێ هاوكاريى هێزه ئه‌منييه‌كان بكه‌ن بۆ جێبه‌جێكردنى ئه‌ركه‌كانيان و پاراستنى ئاسايش و سه‌قامگيريى وڵات.
دوايين پێشهاته ئه‌منييه‌كان و به‌ئامانجگرتنى چه‌ند شوێنێكى هه‌رێمى كوردستان، ته‌وه‌رێكى ديكه‌ى ديداره‌كه بوو. تيايدا هه‌ردوولا جه‌ختيان كرده‌وه كه پێويسته ڕێز له سه‌روه‌ريى عێراق بگيرێت و ڕه‌تيانكرده‌وه عێراق بكرێته گۆڕه‌پانى يه‌كلاكردنه‌وه‌ى ناكۆكييه هه‌رێمييه‌كان، هه‌روه‌ها دووپاتيان كرده‌وه كه عێراق و هه‌رێمى كوردستان پابه‌ندن به په‌يوه‌نديى دۆستانه له‌گه‌ڵ وڵاتانى دراوسێ و به‌وه‌ى خاكى عێراق نه‌بێته سه‌رچاوه‌ى هه‌ڕه‌شه بۆ ئه‌و وڵاتانه.
