قوباد تاڵەبانی لەگەڵ کۆنسوڵی گشتی ئەمریکا لە هەولێر کۆبووەوە
سیاسی
- 30-06-2022, 17:56
هەولێرـ INA
قوباد تاڵەبانی جێگری سەرۆک وەزیران پێشوازیکرد لە رۆبەرت پاڵەدینۆ کۆنسوڵی گشتی ئەمریکا لە هەولێر و لە کۆبوونەوەی نێوانیاندا چۆنییەتی بەهێزکردنی کەرتی تایبەت و کەمکردنەوەی رۆتین لە دامەزراوەکانی حکومەتی هەرێم تاوتوێ کرا. نووسینگەی ڕاگەیاندی قوباد تاڵەبانی لەڕاگەیاندراوێکدا کە بۆ ئاژانسی هەواڵی عێراقی (INA) ناردووە ڕاگەیاند: لەکۆبوونەوەکە کە رۆژی پێنج شەمە ٣٠ حوزەیرانی ٢٠٢٢ بەڕێوەچوو، قوباد تاڵەبانی ستایشی رۆبەرت پاڵەدینۆی کرد کە لەماوەی کارکردنیدا لە هەولێر رۆڵی گەورەی بینیوە لە پتەوکردنی پەیوەندییەکانی نێوان هەرێمی کوردستان و وڵاتە یەکگرتووەکانی ئەمریکا و بەبۆنەی کۆتاییهاتنی ئەرکەکەشی وەک کۆنسوڵی ئەمریکا لە هەولێر هیوای سەرکەوتنی بۆ خواست لە ئەرکەکانی داهاتوویدا.
لە تەوری سەرەکی کۆبوونەوەکەدا باسی چۆنییەتی بەهێزکردنی کەرتی تایبەت و کەمکردنەوەی رۆتین لە دامەزراوەکانی حکومەتی هەرێم کرا. لەمبارەیەوە جێگری سەرۆک وەزیران پلانی حکومەتی باس کرد بۆ گەشەپێدانی کەرتی تایبەت و رایگەیاند ئامانجی حکومەتە لەڕێی بەهێزکردنی کەرتی تایبەتەوە ژێرخانی ئابوری هەرێم بەهێز بکات و هەلی کاری زیاتر بۆ هاوڵاتیان بڕەخسێنێت.
هەروەها لەبەشێکی دیکەی ڕاگەیندراوەکەدا هاتووە قوباد تاڵەبانی باسی لەوەشکرد لەپێناو کەمکردنەوەی رۆتین لەم دوایانەدا لەگەڵ وەبەرهێنەران کۆبووەتەوە و لە ئێستاشدا لەگەڵ دامەزراوەکانی حکومەت کاردەکەن بۆ گرتنەبەری رێوشوێنی پێویست بۆ کەمکردنەوەی رۆتین.
لە کۆبوونەوەکەدا کۆنسوڵی گشتی ئەمریکا سوپاسی قوباد تاڵەبانی کرد کە لەماوەی رابردوودا هاوکاریان بووە لە بەهێزکردنی پەیوەندییەکانی نێوان حکومەتی هەرێم و ئەمریکا. هەروەها ستایشی هەوڵەکانی قوباد تاڵەبانی کرد لە بەرەنگاربوونەوەی توندوتیژی خێزانی و بەرگری لە ئازادی رۆژنامەگەری لە کوردستان.
