پەرلەمانتارە سەربەخۆكان دەستپێشخەرییەكی 7 خاڵی بۆ كۆتایی بنبەستی سیاسی رادەگەیەنن

بەغداد  - INA
پەرلەمانتارە سەربەخۆكان ئەمڕۆ یەكشەممە، دەستپێشخەرییەكی 7 خاڵییان بۆ كۆتاییهێنان بەبنبەستی سیاسی عێراق راگەیاند و داوادەكەن سەرۆك وەزیران كەسێكی خاوەن ئەزمونی سیاسی و سەربەخۆ و دەستپاك بێت.
ئەندامانی ئەنجومەنی نوێنەرانی عێراق لە كۆنگرەیەكی رۆژنامەنوسیدا دەستپێشخەرییەكیان بۆ كۆتایی بە بنبەستی سیاسی عێراق راگەیاند، لەو دەستپێشخەرییەدا كە دەست ئاژانی هەواڵی عێراقی كەوتووە، داوا دەكەن حكومەتی نوێی عێراق لەسەر بنەمای وادە و پشكی دەستوری پێكبهێنرێت و هیچ لایەنێكی دەرەكیش دەستوەردان لەكاروباری ناوخۆی عێراقدا نەكات، هەروەك داوادەكەن گەورەترین كوتلەی پەرلەمانی دروست بكرێت و  كەسێك بۆ پۆستی سەرۆك وەزیران هەڵبژێرن، كە سەربەخۆكان پێشنیازی دەكەن بۆ پێكهێنانی حكومەت بەجۆرێك پشتیوانی بكرێت و بتوانێت چاكسازی سیاسی و ئابوری بكات و روبەڕوی گەندەڵی ببێتەوە.
ئاشكراشیانكردووە، كە كاندیدی سەرۆك وەزیران دەبێت كەسێكی سەربەخۆ، دەستپاك، خاوەن ئەزمونی سیاسی بێت و نابێت مشتومڕئامێز بێت، هەروەها دەبێت گەندەڵی و بەهەدەردانی سامانی گشتی رابگیرێت و لە كارنامەی حكومەتەكەیدا گرنگی زیاتر بە كەرتی پیشەسازی، كشتوكاڵ، گەشتیاری، وەبەرهێنان، پەروەردە و چینی گەنجان بدات.
هەروەها بە گرنگی دەزانن سەرۆك كۆماری عێراقیش لەسەر بنەمای ئەو مەرجانە هەڵبژێردرێت كە لە دەستوری عێراقدا ئاماژەی بۆ كراوە، بۆ ئەو مەبەستەش لیژنەیەك لە سەربەخۆكان دروست دەكرێت بۆ گفتوگۆ لەگەڵ لایەنەكان و كۆتاییهێنان بە قەیرانی سیاسی.
پێشتریش دوێنێ‌ شەممە، ئەمیر مەعمووری ئەندامی ئەنجومەنی نوێنەران بە ئاژانسی هەواڵی عێراقی ڕاگەیاند: گفتوگۆكانی نێوان پەرلەمانتارانی سەربەخۆ بەردەوامە لەسەر دەستپێشخەرییەكەیان و ئەمڕۆ تەواو دەبێت و سبەینێش لە ئەنجومەنی نوێنەران ڕادەگەیەنرێت، وتیشی: ئەمشەو كۆبونەوەیەك هەیە بۆ تەواوكردنی.
ئاشكراشیكرد: دەستپێشخەرییەكە بریتیە لە نەخشەڕێگایەكی سیاسی بۆ دەرچوون لەبنبەستی سیاسی و ئاراستەی هەموو كوتلەكان دەكرێت و پەرلەمانتارە سەربەخۆكان تیمێكی دانوستانكاریان دەبێت بۆ ئەوەی لەگەڵ كوتلەكان پەیوەندی بكەن بۆ دەربازكردنی قەیرانەكە.
تەئكیدیشیكردەوە: كە ژمارەی ئەندامەكان دەگاتە 40 ئەندام و نوێنەرایەتی هەموو پێكهاتەكان دەكات.