كازمى: كارده‌كه‌ین بۆ ئه‌نجامدانى هه‌ڵبژاردنى پێشوه‌خته خواستى گه‌ل جێبه‌جێبكات
- 22-10-2020, 00:00
به‌غدا-اه‌ع
مسته‌فا كازمى سه‌رۆك وه‌زیران رایگه‌یاند، حكومه‌ته‌كه‌ی كار بۆ ئه‌وه ده‌كات هه‌ڵبژاردنی پێشوه‌خت و دادپه‌روه‌رانه بكرێت، كه خواست و ئاواته‌كانی گه‌لی عێراق جێبه‌جێبكات، هاوكات ده‌یانه‌وێت ئابوریی عێراق له ڕوخان بپارێزن.
مسته‌فا كازمی، سه‌رۆك وه‌زیران له له‌نده‌نی پایته‌ختی بریتانیا له لێدوانێكی رۆژنامه‌وانیدا كه په‌یامنێرى ئاژانسى هه‌واڵى عێراقى (اه‌ع) ئاماده‌ى بوو رایگه‌یاند: "كار ده‌كه‌ین بۆ ئه‌وه‌ی هه‌ڵبژاردنی پێشوه‌خت و دادپه‌روه‌رانه ئه‌نجامبده‌ین، كه داخوازی و ئاواته‌كانی خه‌ڵكی عێراق جێبه‌جێبكات".
وتیشی، "ده‌مانه‌وێت ئابوریی عێراق له ڕوخان بپارێزین، هه‌ر له‌به‌ر ئه‌وه‌ش په‌ڕه‌ى سپیمان بۆ چاكسازی پێشكه‌ش كرد، عێراق ده‌توانێت ڕۆڵی ئه‌رێنی بگێڕێت له هێوركردنه‌وه‌ی ئه‌و ئاڵۆزیه‌ی له ناوچه‌كه‌دا هه‌یه".
كازمی ئاماژه‌ی به‌وه‌كرد، "گه‌شتی ئه‌وروپامان ئه‌نجامدا بۆ پته‌وكردنی په‌یوه‌ندییه‌كانی عێراق له‌گه‌ڵ هاوڕێ و دۆسته‌كانمان كه به‌شداری شه‌ڕی دژی داعشیان كردوه، په‌ره به ده‌زگاو دامه‌زراوه ئه‌منیه‌كانی ده‌وڵه‌ت ده‌ده‌ین و ئامانجمان زاڵبونه به‌سه‌ر كێشه‌كاندا و بۆئه‌وه‌ش ده‌بێت خۆڕاگرو خۆڕاگربن".
ئه‌وه‌شی خسته‌ڕوو "ئێمه نامانه‌وێت بگه‌ڕێینه‌وه بۆ هیچ ناكۆكییه‌ك له ناوچه‌كه‌دا، عێراق پێویستی به هێزی سه‌ربازی نییه له‌سه‌ر زه‌وی، به‌ڵكو پێویستی به‌راوێژ و راهێنانی سه‌ربازی هه‌یه".
