سەرۆك كۆمار جەختیكردەوە لەگرنگی یەكخستنی وتاری ئاینی بۆ بەگژاچوونەوەی توندوتیژی و توندڕەوی
ناوخۆ
- 25-06-2020, 00:00
به‌غدا-اه‌ع
دكتۆر بەرهەم ساڵح سەرۆك كۆمار،ئەمڕۆ پێنجشەممە،جەختیكردەوە لەگرنگی یەكخستنی وتاری ئاینی و پتەوكردنی یەكڕیزی نێوان پێكهاتەكانی گەلی عێراق بۆ بەگژاچوونەوەی توندوتیژی و توندڕەوی
نوسینگه‌ى ڕاگه‌یاندنى سه‌رۆك كۆمار له‌ڕاگه‌یه‌ندراوێكدا كه ده‌ستى ئاژانسى هه‌واڵى عێراقى(اه‌ع)كه‌وتووه،بڵاویكرده‌وه "سەرۆك كۆمار، لە كۆشكی سەلام له‌به‌غدا پێشوازیكرد لە هەر یەك لە د. غەنی زغەیر عەتییە سەرۆكی دیوانی وەقفی شیعی و د. سەعد حەمید كمبش سەرۆكی دیوانی وەقفی سونی و ئەندازیار رەعد كجە جی سەرۆکی دیوانی وەقفی مەسیحی.
به‌پێى ڕاگه‌یه‌ندراوێكه سەرۆك كۆمار جەختیكردەوە لەگرنگی یەكخستنی وتاری ئاینی و پتەوكردنی یەكڕیزی نێوان پێكهاتەكانی گەلی عێراق بۆ بەگژاچوونەوەی توندوتیژی و توندڕەوی، ھاوکات ئاماژەیكرد بەوەی فرەیی لە پێكهاتەی كۆمەڵگەی عێراقی یەكێكە لە بنەما بەهێز و كاراكان بۆ بەھێزکردنی كۆڵەكەی كۆمەڵ و چەسپاندنی ئاشتی كۆمەڵایەتی لە رێگەی بڵاوكردنەوەی كەلتوری لێبوردەیی لە وڵاتدا.
لە تەوەرێکی دیکەی دیدارەکەدا سەرۆك كۆمار، رۆڵی پیاوانی ئاینی بەرزنرخاند لە بڵاوكردنەوەی لێكگەیشتن و بنەما ئاینییەکان و چەسپاندنی یەكڕیزی نیشتمانی و رێگری لە بڵاوکردنەوەی بیری توندڕەوی كە گروپی تیرۆرستی داعش مەرامێتی بڵاوی بکاتەوە.
لەلای خۆیانەوە، سەرۆکی ئەوقافە ئاینییەكان جەختیانكردەوە كە هەوڵەكانیان بەردەوام دەبێت لە پێناو پتەوكردنی رایەڵەی پەیوەندییەكان لە نێوان گەلی عێراق لە تەواوی پێكهاتە و نەتەوە جیاجیاکان، ھەروەھا بڵاوكردنەوەی خۆشەویستی و برایەتی لە نێوان پێكهاتەكانی كۆمەڵگەی عێراق دا.
