به‌هۆى كارێكى تێكده‌رانه له‌ڕۆژهه‌ڵاتى به‌غدا 700 مێگاوات کارەبا لەدەستدرا
ناوخۆ
- 20-05-2020, 00:00
به‌غدا-اه‌ع
وەزارەتی کارەبا،ئه‌مڕۆ چوارشه‌ممه، رایگەیاند، هۆکاری کەمبوونەوەی کاتژمێرەکانی کارەبا بۆ لە دەستدانی 700 مێگاوات کارەبای نیشتمانی دەگەڕێتەوە، کە بە هۆی کارێکی تێکدەرانە زیانی بەرکەوتووە.
ئەحمەد موسا عه‌بادى، وتەبێژی وەزارەتی کارەبا له‌لێدوانێكى بۆ ئاژانسى هه‌واڵى عێراقى(اه‌ع) رایگەیاند، بەهۆی کەمبوونەوەی کاتژمێرەکانی کارەبا وەزارەت داوای لێبووردن لە هاووڵاتییان دەکات.
روونیشی کردەوە، بەرزبوونەوەی پلەی گەرما و زۆربوونی خواست لەسەر بەکارهێنانی کارەبا هۆکارێکی سەرەکی کەمبوونەوەی کاتژمێرەکانی کارەبایە.
ئاماژەی بەوەشدا، نەتوانراوە چەندین یەکە لە وێستگەکانی کارەبا نۆژەن بکەنەوە، کە هۆکارەکەی بۆ نەبوونی بودجە و خەرجی پێویستە بۆ نۆژەنکردنەوەی یەکەکان لە کاتێکدا دەبوایە بۆ وەرزی هاوینی ئەمساڵ بەکارهێندرابان.
راشیگەیاند، هێرشەکان بەرنامە بۆ دارێژراون بۆ بە ئامانج کردنی هێڵەکانی گواستنەوەی کارەبا، کە کاریگەری لەسەر کاتژمێرەکانی دابینکردن هەبووە، جەختیشی کردەوە، دووشەممەی رابردوو هێڵی مەنسوورییە دیالە تەقێندرایەوە، هەروەها هێڵی ئەمین لە رۆژهەڵات بەغدا کەی ڤی 400، دوێنێ سێشەممە بە کارێکی تێکدەرانە پەکی کەوت و بەهۆیەوە 700 مێگاوات کارەبا کەمیکردووە.
