زێدان لەگەڵ جێگری سەرۆكی ئیمارات باس لە زیادكردنی هاوكاری دادوەری دەكات
سیاسی
- 30-03-2023, 20:43
بەغداد - INA
سەرۆكی ئەنجومەنی باڵای دادوەری حاكم فایق زێدان ئەمڕۆ پێنجشەممە، لەگەڵ شێخ مەنسور بن زاید ئال نەهیان جێگری سەرۆكی دەوڵەتی ئیمارات گفتوگۆیكرد لەبارەی زیادكردنی هەماهەنگی نێوان هەردوو وڵات لەبواری دادوەری.
ئەنجومەنی دادوەری لەبەیاننامەیەكدا كە بۆ ئاژانسی هەواڵی عێراقی ناردووە، دەڵێت: سەرۆكی ئەنجومەنی باڵای دادوەری حاكم فایق زێدان لە پەراوێزی سەردانەكەیدا بۆ ئیمارات لەكۆشكی نیشتمان چاوی بە شێخ مەنسور بن زاید ئال نەهیان جێگری سەرۆك و جێگری سەرۆك وەزیران و وەزیری دیوانی سەرۆكایەتی كەوت.
لەبەیاننامەكەدا ئەوەش خراوەتەروو: كە لە كۆبوونەوەكەدا گفتوگۆ لەسەر ڕێگاكانی پەرەپێدانی هەماهەنگی نێوان عێراق و ئیمارات لە بواری دادوەری و چەند دۆسیەیەكی جێی بەرژوەندی هەردوولا كرا.
بەیاننامەكە ئاماژەی بۆ ئەوەشكردووە: لە كۆبوونەوەكەدا وەزیری داد و سەرۆكی دادگای فیدراڵ عەبدوڵا بن سوڵتان بن عەواد نعێمی و باڵیۆزی عێراق لە ئیمارات موزەفەر مستەفا جبوری ئامادەبوون.
